視光師

嚴格嚟講,呢個係豔遇(不過冇愛情動作成份)⋯⋯

話說,上星期走左去銅鑼灣間愛X美配眼鏡。

其實之前都喺度配眼鏡都配過幾次,配開配熟,唔會有咩特別嘅expectation。

如是者,去到,坐底,同個SALES佬講我要啲乜鏡物鏡,等驗眼,成個程序suppose就係咁死咁簡單。

而唔知點解,等緊驗眼嗰陣,對眼突然之間好攰,所以就索性除咗副眼鏡⋯⋯

⋯就喺呢個moment,視光師喺間房入面行出嚟,叫我入去:

「Hello,我叫Ivy呀,麻煩入嚟呢邊坐底丫⋯⋯」佢用有少少ABC嘅口音同我講。

喺度解釋下先:

  • 由於小弟兩隻眼都有超過500度近視,所以基本上睇50cm以外嘅嘢已經會蒙⋯⋯
  • 而當時視光師Ivy企喺我2-3米以外,所以我只能夠隱約睇到一個長頭髮、身高約170、身形纖瘦嘅長腿女子⋯⋯

我雖然固作鎮定咁行入去,而其實我心裡面正在吶喊緊:「唔・那・係・呀~~~~?」

當然,做咗咁多年人,明白好多時自己雙眼都未必信得過,更何況我冇帶眼鏡嗰陣(所以先要配眼鏡)⋯⋯

⋯⋯所以我同自己講:「冇嘢嘅,邊有咁荀,呢個世界邊有咁多靚女!?」

入到去坐底,依然冇帶眼鏡,佢一路同我講解驗眼過程(好似係,但我已經聽唔入耳),我一邊要控制自己唔好咪起對眼望佢個樣,因為咁實在太猥瑣。

講解完一輪之後,我最期待嘅畫面終於出現啦,就係戴上-驗眼眼鏡!

⋯⋯咁我就可以睇清楚究竟我有冇睇錯嘢!

一戴上之後,梗係唔會第一時間望佢啦,都係嗰句:「太猥瑣!」(加上佢企喺離我唔夠20cm嘅位置幫我調教緊副眼鏡,點望呀大佬)

「等機會!」我同自己講⋯⋯

依家眼下最重要嘅事係集中精神喺眼前嘅視力表,用我最大嘅意志力去控制我雙眼唔好漂移去第二度⋯⋯

認真,真係好難⋯⋯

但係我又真係忍到!直到佢擰轉面望住個視力表嗰下,我終於望到佢清晰嘅側面!

配眼鏡呢一刻,我好肯定,呢個視光師係-堅・靚・女!

如果一定要搵個人嚟比喻嘅話,我會話佢個樣似日本女星綾瀨遙,不過塊面再尖啲啲。

而喺之後嘅過程,我都係望下視力表,然後偷望下佢,望下視力表,又偷望下佢⋯⋯

⋯⋯諗住咁,就可以捱過呢個意志力嘅考驗。

點知事與願違,佢無端端話要Test下我兩隻眼嘅焦點⋯⋯

Well,我唔知Test咩焦點,之前亦都未Test過,我剩係知Test咪Test囉,我都肉隨砧板上㗎啦⋯⋯

【嗱,有時我都會係度諗,究竟係件事本身係咁,定純粹我幻想太多呢⋯⋯?(我都有自省能力㗎!!!!)】

佢拎著張手掌咁大嘅硬咭紙,行近我前面,烏低身,拎住張咭喺我面前10cm嘅位置⋯⋯

⋯⋯然後同我講:「嗱,你依家望住張咭上面個’4’字丫。」

我知道,無論我望去張咭紙嘅上、定下、定左、定係右,都係一個好唔禮貌嘅行為⋯⋯

驗眼⋯⋯所以我盡我最大嘅集中力去睥行個’4’字!

我已經唔知嗰一刻我對眼點顫抖法,我剩係知我紅都面埋、標都汗晒!

望住個’4’字嗰5秒鐘,我以為望咗10分鐘,真係入咗精神時間房一樣!

我真係心諗:「配眼鏡啫,唔洗丫麻⋯⋯」

如下落嚟Ivy同我解釋啲咩焦唔焦、點唔點,我都已經冇心力去聽,剩係臨走前佢問我仲有冇啲咩問題,我話:

「冇啦,呢個係我有生以來,最好嘅驗眼經驗⋯⋯」

「吓,點解嘅?」

「Errrr⋯⋯唔知呢。」

完。

P.S. 唔好問我有冇圖,自己上去驗眼啦(利申:唔係廣告)

NO COMMENTS