男校生活

好多讀男女校嘅人都會問我一個問題:

「究竟男校多唔多人HeHe?」

小弟嘅中學生涯有一大截都係男校中渡過(F.1 – F.5),不過大家千祈唔好以為呢篇係講男校HeHe,十幾年前冇依家咁開放,邊有咁多人敢出櫃⋯⋯

就算某啲同學我哋會覺得佢好乸型,但係就從來冇過問佢嘅性取向⋯⋯

可能係因為男校大多數人都唔會有女朋友(亦都冇女仔),嗰個人鍾唔鍾意女仔就更加無從稽考。

Any肥,好多人第二樣會問嘅係點解當年小弟會揀讀男校?

理由戇居到你唔信:

因為小學鍾意踢波,而我讀嗰間男校隔離有個足球隊,所以揀佢,諗住中學可以日日踢⋯⋯

⋯⋯點知,上到中學剩係鍾意打籃球,重要係日日打!

所以基本上小弟嘅中學生涯,even上到中六、七讀男女校,都係籃球、籃球、同籃球⋯⋯

讀男校有樣好,就係大家都會好專注去做自己鍾意做嘅嘢,因為冇女丫麻~

所以大部分讀男校嘅人(總有啲人乜都唔做嘅),鍾意讀書就真係會好專注讀書;鍾意踢波就無論咩天氣都要落波地;踢毽、康樂棋、中學常識問答比賽等等等等⋯⋯

當然讀男校喺咪就唔會諗女仔呢?

梗係唔會唔諗啦~

重點係,喺我學校對面(只係相隔一條馬路),係一間女校⋯⋯

基於我間學校係起喺斜坡嘅上邊,所以每當小息、lunchtime、同埋放學,我哋就會隔住鐵絲網望過去對面⋯⋯

⋯⋯就好似動物入面嘅猩猩隔住個籠,好飢餓咁望住遠方嘅香蕉,流晒口水但係冇得食!(聽聞對面啲女學生係咁形容我哋)男校

講返打籃球⋯⋯

男校打籃球基於受到《籃兒當入樽》嘅薰陶,就算我冇遇到安西教練,甚至冇打學界比賽,我都每朝早6:30就會返到學校打波,仲勤力過班校隊。

所以⋯⋯每朝上第一堂嘅時候我都係已經濕晒身,到差唔多乾,第一個小息,又濕晒,然後lunch,然後放學⋯⋯

⋯⋯基本上全日乾嘅時間大概只有一個鐘。

當然,咁打法,好快同級嘅人已經冇對手,於是走去同高年級嘅人打,都滿足唔到我,就出去同街外人打⋯⋯

試過有一次,遇到個高手,佢知我想贏佢,於是佢就同我賭每場$20⋯⋯

基本上,頭兩個禮拜每日擺低一舊水,但係到我開始贏到一兩鋪,就俾人割禾青。

須則回唔到本,但係由開頭輸到貼地,到慢慢入到多啲波,到贏第一次嗰種心路歷程,真係冇其多嘢可以比擬!

嗰種即使唔喺球場上面,但係每分每秒食緊飯痾緊屎瞓緊覺,都喺到諗住場波點樣打,呢球應該點樣過佢,點樣防守佢⋯⋯

⋯⋯呢一種廢寢忘餐咁去追求一樣嘢,試問你有幾耐冇試過?

又或者⋯⋯你從來都冇試過?

可能你會問,咁又點?你依家又唔係打NBA⋯⋯

喺一本小弟十分喜愛嘅書《Way Of The Peaceful Warrior》(中文名叫:深夜加油站遇見蘇格拉底)其中一句對白:

“The Journey itself brings us happiness…… not the destination.”

從來,喺我地追求一樣嘢嘅時候,嗰種期待都係帶俾我哋最大嘅滿足感,反而到你得到咗嘅時候往往剩底嘅只有失落。

所以只有不斷追求、不斷向前,先能夠keep住你嘅動力。

工作如是,人際關係亦如是。

近日因為曹仁超嘅離世,FaceBook都被曹Sir嘅一句說話洗版了:

「即使好運或者憑父蔭,25歲前儲到首期,開始供款,供到45歲為止,到時都不用想創業了。所以我經常寄語年輕人,不要讓500尺綁住你的青春。」

小編唔係話唔俾人買樓,我相信好多人係真心想安居樂業⋯⋯

⋯⋯但同時間亦有好多人「以為」自己必須要買樓,才會快樂。

見身邊有啲朋友為咗買樓,死慳死抵,唔敢去旅行,唔敢食得好著得好,真係何苦⋯⋯

可能睇到呢度,你會覺得小弟係異類,係小眾⋯⋯

但正如全球最知名嘅激勵大師Bob Proctor喺佢本《The Art of Living》所講:

“When you see a large group of people going one way and only a few going the other way, follow the small group. You’ll probably never make another mistake as long as you live. If you follow the masses, you’re really going to be in a mess. Why? Because the masses have no idea where they’re going.”

即係咩?

即係就算係大環境大趨勢之下,你都應該做你自己,做你真心想做嘅事情,知道自己嘅位置,而更重要嘅係,知道自己去緊邊度⋯⋯

唉,明明講緊男校生活,唔知點解講下講下,又認真咗tim⋯⋯Sor99y

P.S. 都話咗冇HeHe㗎啦,又唔信~

NO COMMENTS