儲錢旅行

唔少香港人都好鍾意去旅行

而如果你唔係李嘉誠,唔係李嘉誠個仔,唔係飲紅酒嘅中產,相信去一次旅行都係要儲錢先嘅……

而,分分鐘儲咗嘅錢都只係夠搭廉航,住民宿,but so what?

作為一個不折不扣嘅香港人嘅我

同樣有住一顆想離開呢個城市嘅心,畢竟呢個城市有時真係太令人窒息

每當上到機熄電話嘅一刻,我總係有種解脫嘅感覺

就好似所有煩惱隨住飛機噴射引擎噴出嚟嘅氣咁⋯⋯拋諸腦後,有乜返嚟先講

所以無論係去台灣、日本、歐洲定非洲,都好似係去Wonderland咁。

雖然身邊不乏鍾意去旅行嘅朋友,但唔知點解搵個旅伴仲難過中一億。

可能因為要去旅行,所踏出嘅第一步。。。即係儲錢,真係好難。

香港地,香港人,搵錢難,儲錢仲難,你懂的……

去一次旅行儲錢短則一、兩個月,長則半年有多

而選擇旅伴,往往都會揀身邊親密嘅人,例如好朋友、男女朋友、屋企人

點解?

因為去旅行其中一個原因係為咗減壓,所以選擇旅伴嘅先要條件係佢唔可以帶到壓力畀你……

有一次,同朋友⋯⋯ 同埋佢全家呀爸呀媽姨媽表姐一齊去曼谷

每日要準時十點起身,非食酒店早餐不可,所有景點要去勻哂,一舉一動一字一句都驚佢老一輩唔鍾意⋯⋯(下省一千字⋯⋯)

而,其中一日,朋友呀媽同朋友講我無同佢講早晨

「你朋友好無禮貌。」

Oh…Hi…Auntie?

返嚟之後,我立誓,以後唔會同朋友嘅屋企人⋯⋯唔熟嘅人去旅行⋯⋯(除非⋯⋯)

而點解我要跟埋佢地屋企人去?

事關我個位朋友唔肯儲錢,咁同屋企人去咪屋企人畀埋囉⋯⋯



兩年前約定兩位好友嘅旅行,到今時今日十劃都仲未有半撇

初初總係「好呀好呀,我都想去呀,你搵機票呀。」

「喂係咪去架?我搵到有平機票喎」

「係呀係呀」

「喂我訂架啦。你有錢未?」

「……」

Fine。

最後,兩位好友分別同咗佢地嘅男朋友去旅行。

一年前

「BB呀,不如一齊儲錢去旅行囉?」

「好呀」

「說好的旅行呢?你得閒就book機票啦,就放假啦。」

「我無錢呀,遲啲先啦。」

Fine。

「得個講字」到底係後天嘅性格定人嘅天性?

其實係咪「得個講字」,應該係取決於你或者件事對對方有幾重要….

去旅行,除咗幫自己減壓,更重要嘅係想同個位旅伴創造多一啲回憶…

我想你知,我搵得你一齊去旅行,講得出想同你一齊去

係證明咗你係我心目中,甚至生命中係佔一席位,一個重要嘅位置

而我想得到嘅回應,並唔係單單一句「好呀」

而係有所行動,一齊儲錢,一齊睇機票,一齊搵酒店,一齊Plan,一齊期待

「講」係人都識,肯「做」個個,先係最值得珍惜。

半年前

「喂,一齊去旅行囉今年。」

「好呀去邊?儲下錢先。」

「日本囉,yen跌。」

半年後

「執好行李未?聽晚八點機喎」

謝謝你,那個肯儲錢陪我去旅行的你,那個重視我的你。

 

P.S. 我唔排除其實只係佢自己想去旅行,但佢肯同你去,其實已經證明咗你都有一定份量。

NO COMMENTS