其實毒撚一個更開心

以下為真實對白,如有雷同,實屬不幸

情人節男友人:How’s your day?

威士忌:Good and yours?

男友人:Mine is just like finished work(笑喊)……

我GET左一陣先明……哦,情人節同女朋友慶祝係一份差事

仲要係苦差。

嗰個笑喊符號,到底係笑到喊,定係喊住笑呢?

不得而知……

對於男人黎講,情人節完完全全只係一個純粹嘅商業產物

仲要係萬惡個隻!

肯肯定每十個男人有十一個係一個月前已經開始咁諗:

「到底係邊Q個發明啲咁嘅節日?」

點解係「一個月」前?

好簡單,2月14餐飯,你唔一個月前book定,

到2月14就要女皇同你一齊等位!

要女皇同你一齊等位,你注定過一個畢生難忘嘅⋯⋯懲人節。

你以為淨係book位咁簡單咩?

唔好傻啦,你仲要諗食啲咩先夠浪漫,先夠特別,先夠奢侈⋯⋯

當你用一個星期睇曬成個OpenRice

你要開始諗禮物、禮物、禮物

你每晚攝高枕頭,每日上網睇攻略,每分每秒只想洞悉她的心意⋯⋯

因為你知道,你揀錯呢一份禮物,你可能以後連送禮嘅機會都無

餐廳book好,禮物揀好,好!搞掂!

「bb呀,你睇下呢紮花,好靚呀!」

「係咩,ok啦,咪又係咁,擺兩日咪又係要dum」

「咁呢啲呢,公仔花,唔會謝嫁,擺成世都得!」

「下,但係唔真又唔靚喎」

「嗱,咁呢個小王子的玫瑰啦,又唔會謝又真又靚」

你開始明白,無論真花假花公仔花定痴膠花

總之,佢一定要收花。

但係你又心知,你真係可以買一束假花比佢咩?

最後咪又就係買左情人節吊高黎賣嘅玫瑰花。

搞掂呢一切後,你已經提早糧尾。

而呢一切只係事前嘅Proposal⋯⋯

到情人節當日,首先你要精心打扮去配合佢

要係見到佢嘅個一刻獻上玫瑰,好讓佢可以拎住曬……日光

真係,喺個一日,港女們手上拎住嘅花好似識發光咁。

你帶左佢去一個好靚嘅地方,用盡你所有影相嘅天份

只為令佢今晚有一張靚相可以post:今日BB帶左我去呢到玩,有你真好,好幸福呀,Love you!

重頭戲嚟啦,食情人節大餐。

你好緊張,到底佢滿唔滿意今晚嘅晚餐安排?

到底佢收到禮物後,會係:

  1. 西面得黎嘴角微微上揚:「多謝你呀BB。」然後成餐飯無再出過聲?
  2. 開心到兩個嘴角痴住蘋果肌:「嘩!BB你點知我想要嫁?好鐘意啊!你真係好!」(下省一萬字讚美說話)

其實毒撚一個更開心

如係2,恭喜你,你老細表示你今日嘅工作表現好好,呢份差事辦得好

假如係1,都恭喜你,輕則獲得一星期自由,重則來年情人節可以輕鬆唱著「其實獨撚一個更開心~」

完成一日嘅工作,你返到屋企,同朋友訴說:

“Mine is just like finished work……”

當中嘅笑喊符號,穩藏著幾多嘅辛酸,幾多嘅無奈,幾多嘅壓力,只有你自己知……

************************************************* 

當然,你會話,車,有情人日日都係情人節,我女朋友唔會咁小器。

自己睇,唔多講:

李斯特城

(摘自FanPiece《為左場波,我同女朋友分手。》——毛言地)

結果係點?

輸左場波,輸埋個女友。

************************************************

又當然,並唔係個個港女都係咁嘅,但就肯肯定個個女人都想自己嘅男人肯為佢花心思!

而情人節,正正就係比你地班平時懶得搞驚喜嘅港男發揮嘅一個日子。

如果個女人平時肯陪你捱M記,2月14請佢食返塊扒,都唔係好過份姐⋯⋯

最緊要係,即使你幾咁憎呢個節日都好,

你始終都會絞盡腦汁,做好呢份工。

點解?

因為,你愛佢囉(好似係)⋯⋯

⋯⋯至於單身的你,或許現時你未能明白本文所指,但我相信,總有一天⋯⋯

NO COMMENTS