有啲人天生可以吃辣,有啲人係靠後天努力⋯⋯

小弟屬於後者。

記憶之中,由細到大都唔係特別嗜辣,一來幼嫩嘅舌頭未得到開發⋯⋯

⋯⋯二來,聽講話愈吃得辣嘅人處事愈冷靜,反之亦然,所以小弟細細個時極之火爆(好似幾準)

人生第一次真真正正對辣產生興趣,係早幾年仲喺某大電訊工司做緊Sale屎嘅時候。

每逄下晝唔洗見客又冇咩做嘅時候(通常一個禮拜3、4日咁啦),就會約埋幾個相熟嘅同事⋯⋯

吃辣⋯⋯一齊去荃灣四坡坊,食一間叫做「唯一雲貴川風味」嘅麻辣米線(唔食得辣或有易激腸嘅朋友千祈唔好試)

呢間嘢有咩咁正?

佢大部分可以俾你選擇嘅餸都係經過長時間醃製,換言之,入味到咩咁!

其中佢嘅炸醬同腩肉,簡直係極品中嘅極品(頂!寫到我不停口水分泌)

不過一碗出色嘅麻辣米線,絕對唔能夠剩係啲餸好食入味就夠,一定要符合埋以下幾個條件s:

  1. 米線要煙韌彈牙
  2. 湯底嘅「麻」同「辣」要平衡
  3. 最重要係,夠・大・碗

培育吃辣之道

就係咁,小弟由不太吃辣,到愈吃愈辣

一切都係皆因「辣得好過癮呀~」

由初初只能夠吃小辣米線,到挑戰中辣,再到大辣(第一次食完之後半個鐘內肚痾),當中都有唔少人生哲學可以領悟到:

 第一,要駕馭「辣」,必須要先享受「辣」

你唔能夠視「辣」為「敵」

好多人一覺得辣,就會即刻飲凍嘢解辣

依家好多人都知道飲凍嘢唔單止解唔到辣,仲會愈飲愈辣(解辣飲暖飲/牛奶是常識吧)⋯⋯

⋯⋯但係人就係有一種天生嘅「戰逃機制」,一感覺到受威脅,就博命去反抗,而不知道「辣」嘅存在係為左將食物嘅味道昇華,仍然博命飲凍嘢

第二,愈「辣」,你必須吃得愈慢,不宜操之過急

有啲人當食到辣,辣到成個人嘅氣牆都會被升溫,連帶進食速度都不斷加快

愈快,感覺愈辣,到最後,甚至未到最後,必定會被辣瀆到

咳個三、五、七分鐘先回到氣,因快得慢

所以,吃得愈辣,必須要愈慢

第三,吃好每一啖,絕不能鬆懈

吃辣是種哲學,包括如何去吃

我所講嘅係,你每一個口部動作都必須全神貫注

譬如,食麻辣米線呢啲有湯嘅食物,你絕對唔可以好似平常食湯麵咁大力吸入口

因為啲辣湯好容易會俾你吸入喉嚨深處,一被「深喉」,我好肯定到你食完行出門口搭車返到屋企沖埋涼準備瞓覺⋯⋯都未咳完

所以,每一啖麵都必須要「放」入口,而唔可以吸入口

此外,你食緊嘅途中,必須要盡量用鼻去呼吸,唔好用口

因為辣味極之容易刺激口水分泌,而啲口水都係辣嘅,正如上面所講,帶辣嘅水分如果被吸入喉嚨深處,你將會痛不慾生

所以,即使喺短短嗰15分鐘嘅食麵過程,你必須專注於自己嘅每一個動作,唔好急,唔好亂⋯

⋯先可以平平安安咁食完一碗麻辣米線

做好每一個動作,吃好每一啖!

你可能會諗,咁食法咁攰,點解仲要吃辣?

解辣因為食辣嘢同做人都一樣,總會有你逃不過的「辣」⋯⋯

食嘢,你可以永遠避開唔食辣,但係人生,冇可能永遠只有順流

有時做人,攰了,咪抖下囉

抖夠,就重新上路

如果每次食到辣,你都要夾走晒所有辣椒,或者成碗米線唔食,係好容易⋯⋯

⋯⋯但係你永遠唔會食得飽食得滿足

所以,嘗試去接受你生命中嘅每一種「辣」,麻辣、香辣、酸辣、芥辣(嚴格嚟講唔係辣嘅一種,不過是但啦)⋯⋯

你會發現真正嘅「順流」,係從享受「辣」開始⋯⋯

⋯⋯

P.S. 都係嗰句,吃辣要慢慢培養,所以,「怕辣就食原味唔辣啦~」

P.P.S. 嗱,唔係話食唔到辣做人就好失敗呀,比喻嚟㗎咋,明㗎啦⋯⋯

NO COMMENTS