交友APP可以好正經? 開場白3大法門

    0
    17196

    你好可能一嚟就諗:「痴孖筋!交友App點會有可能正經呀?」

    「除左約砲、約砲、同約砲之外,呢啲App仲可以做乜⋯⋯?」

    唉,唔好咁啦,其實世界冇你諗得咁邪惡㗎(好似係)~

    小弟深信,呢啲平台喺一定程度上係幫到啲真係想識朋友,或者未拍過拖又想拍拖嘅朋友⋯⋯

    我仲聽人講有個朋友個朋友個朋友喺交友App上面搵到佢嘅真愛仲結埋婚添(好似係)~

    (利申:小弟冇用開交友App⋯⋯)

    不過,近日因為工作機會,迫於無奈終於都要接觸⋯⋯

    Tinder 交友所以(真係)喺迫於無奈嘅情況底下,Download左Tinder同Happn(呢個幾得意,可以認識擦身而過嘅陌生人)。(其他交友App真係唔敢掂)

    自問相貌都叫做正常嘅我當然唔擔心冇人回應我啦~

    不過,當有人回應我嘅時候,問題就嚟啦:

    「講咩好呢?」

    一開頭,我都係求其”Hi”下人⋯⋯(其實真係為左做嘢先會撩陌生人講嘢,我好怕羞!)

    tinder開場白

    人哋Hi我,我咪又Hi囉,冇乜特別⋯⋯

    HiHi下發現⋯⋯

    「咦⋯⋯唔對路喎!」

    「點解個個Hi完就冇後續對話嘅⋯⋯?」

    為咗做嘢,所以我決定研究用呢啲交友App應該用咩開場白⋯⋯

    第一件事,當然係問下Google大神啦⋯⋯

    其實只要一search「交友App」呢3個字,已經會有result出嚟教人點樣開始交談。

    而其中一個我覺得幾得意嘅就係Kino寫嘅關於如何提高”命中率”嘅開場白⋯⋯

    狗公你可能喺度諗:「喂,又話玩交友App可以好正經嘅?又唔係約砲App,點解要提高命中率先??」

    嗱,真係唔好心邪~

    因為第一件大家要明白嘅事,就係「交友App嘅生態環境」⋯⋯

    基本上只要係女,每一日就會有數之不盡嘅狗公主動Hi佢。

    Profile Pic影得好啲嘅女仔,就算喺好似Happn呢啲比較新嘅app,每日閒閒地都有廿幾三十條仔同佢地講:

    「Hi!」

    「你好靚!」

    「有冇男朋友?」

    「今晚有乜做?」

    呢啲咁嘅開場白⋯⋯

    如果你係女,到你收到第101條相同message嘅時候,你仲會唔會應丫?

    唔會,係咪?(收到第10條已經唔應啦痴線)

    好,咁點先可以創造到高命中率嘅開場白呢?

    創造高命中率開場白3大法門

    1.做少少功課啦唔該

    睇一睇人地個Profile寫啲乜,有啲咩相,喺邊影,去過邊,對咩有興趣⋯⋯

    真係做好少好少好少好少功課已經夠你打開話題,而對方應你嘅機會亦已經提高咗好多。

    譬如:

    「你影嗰張喺沙灘嘅相好靚wor,喺咪喺浪茄影Ga?」

    無論佢答咩,你都可以制造到話題啦。

    總好過就咁HI⋯⋯

    2.唔好太應真

    交友App冇咩好,係勝在人多!

    所以呢,大家冇必要太認真對待每一次交談。

    嗱,唔係叫你對人玩玩下呀,而係,你永遠無辦法喺訊息對話中完全掌握到對方嘅真正心意⋯⋯

    So, just be yourself.

    講你想講嘅嘢,唔洗太在意對方啱唔啱聽。

    因為咁先能夠喺對話中,顯示到你嘅自信。

    嗱,我講嘅係自信,唔係自負呀。

    咩先係自信?

    「Confidence is not “They will like me”.  Confidence is “I’ll be fine if they don’t”.」

    Confidence is not they will like me

    明啦?

    3.女人來自金星

    女人來自金星有睇過《Men Are From Mars, Women Are From Venus》呢本書嘅朋友,大概都知道女人係相對比較感性,對事情嘅判斷相對比較以感覺行先⋯⋯

    即係話,同女仔講嘢,都係以感覺行先好~

    但係喺訊息嘅開場白中,點能夠帶起對方嘅感覺呢?

    我喺Kino個Blog度就學咗一招⋯⋯

    「直覺話俾我知,你喺個鍾意XXX嘅人」

    XXX係咩,就有賴大家喺對方個Profile度搵啲蛛絲馬蹟啦~

    其他嘅話題,例如相學、心理學、命理等等,都係平時必定能夠同女仔打開話題嘅梗。

    袋定一兩個喺身包冇甩拖!

    SHARE俾你D單身好友睇是常識吧!

    NO COMMENTS