係呢個世界嘅每一個人,無得揀嘅大概只得四件事

一,無得揀嚟,抑或唔嚟呢個世界

二,無得揀做男定女(先天)

三,無得揀自己嘅出生背景(包括老竇呀媽)

四,無得揀唔離開呢個世界

自有意識、有記憶起,我地就不斷咁做緊選擇

係不斷選擇嘅過程中成長、跌低、改變,然後再選擇。

而每一個選擇,其實都改變緊你嘅人生。

一個選擇 一個人生

細細個媽媽問你:想食飯飯定食面面?

你答佢:面面

於是,媽媽就以為你鍾意食面面多過飯飯

你個一段嘅人生,每三餐都有兩餐係「面面」,拉面、粗面、意粉、上海面……

甚至影響你一世,鍾意食面,或者見到面就想嘔

到大個咗,你自己問自己:繼續做打工仔穩賺定創業博發達好?

你選擇創業。

係經營嘅過程中,難免又面對各種選擇:應該放棄定堅持?

一個選擇,一個人生。

如果當日嘅你揀咗繼續打工,當日嘅你揀咗放棄,今日嘅你同今後嘅你,所經歷嘅人生又會係點?

更好?更壞?

揀興趣、揀朋友、揀科、揀情人、揀工作⋯

揀食唔食多件cheesecake、揀去唔去呢個gathering、揀坐咩位食咩好、揀睇唔睇呢篇文……

人生每一個時刻都充滿選擇

選擇過後,結果只得兩個:滿意、後悔。

但往往人對於自己滿意嘅選擇都不以為意,對於後悔嘅選擇偏偏耿耿於心

佢後悔今日食多咗件cheesecake搞到肥咗兩磅

佢後悔當年揀咗讀中文而唔係BBA,搞到今日前路好似茫茫

佢後悔當時同前度分手,搞到好似失咗塊玉

每當人後悔嘅時候,總習慣將自己沉浸於負面思緒當中,仲要愈沉愈深

諗得最多嘅不外乎係:點解我嗰陣要咁揀?如果我無乜乜乜,揀咗乜乜乜,咁咪好囉。

其實又有邊個咁肯定至今所做嘅選擇都係正確?係好嘅?

定其實,每一個選擇根本就無關乎對錯、甚至並唔存在任何嘅對與錯、好與壞?

一個選擇一個人生。

個日佢因為食多咗件cheesecake,所以開心咗一個下晝。

點解係磅重嘅時候唔諗下自己獲得過嘅快樂?

當年佢揀咗中文無揀BBA,佢以為前路茫茫,灰到貼地

但點知原來廿年後嘅佢會成為暢銷作品嘅作家?

佢後悔分咗手無咗塊玉,

但今日係佢身邊嘅係一粒寶石。

每一個選擇,從來都無絕對嘅對與錯、好與壞

揀嘅一刻你覺得正確,他日你又覺得後悔

揀嘅一刻你係迫不得已,今日你又覺得有一絲僥幸。

一個決定的確一個人生,但人生嘅好與壞又點會只取決於你某年某日某刻嘅某個選擇

值得我地認真、執著嘅選擇就只有一個,就係你選擇以咩態度去面對你嘅每一個選擇

少啲後悔,多啲積極,唔洗下下都「人生已完」嘅

「生命滿希望,前路由你創」咪就係咁解囉。

NO COMMENTS