睇波

 

小弟自小就受哥哥薰陶,一直都好喜歡足球,但由於體力同技術所限,每次踢唔夠一陣波就氣喘同腳軟,所以餘下有生之年,都係專注睇波同打足球game算喇。

想當年互聯網尚未普及,屋企冇錢裝收費電視,細細個如果想睇波,只能夠係星期日朝早睇阿叔大哥瑜鍾仔無敵鐵三角主持嘅《球迷世界》,或者係星期六晚扭去明珠台睇《歐洲足球雜誌》。想睇現場的話,就要死守家中,靜待一年一度嘅省港盃同賀歲盃。

睇波
真係好懷念呢個組合,可惜此情不再…

到大個少少,

有個同學屋企裝左NowTV,客廳又夠寬敞,成班朋友逢星期六晚例必買齊啤酒花生,拉大隊殺上26樓林宅睇英超。果種平時係屋企約打online game都唔見咁齊人嘅團結同默契,因為「免費英超」四個字,將一班無尾飛陀嘅蛋散凝聚埋一齊。

 

入波振臂高呼、咀咒敵方球員、有如綻放煙花一樣熱烈地爆粗狂鬧前鋒糟蹋機會(當然要細細聲啦,因為世伯伯母係睡房),愛隊輸波要罰飲一罐啤酒,幾個猶如少數民族嘅朋友反曼革命成功後嘅莫名興奮(呢個世界真係有好多曼聯X)⋯

睇波

窮小子睇波就是如此。

 

小時侯時間朋友皆多,嗜好亦廣。人大左,時間有限,精力漸減,莫講話通一晚頂要成個星期復原,如果當日一早有工作在身,夜晚3點鐘睇場西甲都幾近不可能。拉隊睇波嘅兒時朋友更加聚少離多,各有各生活。而家一星期近乎7天工作,日日早出晚歸,有時連同家人見面時間都欠奉。

近兩年,

真正約埋三五知己睇波真係少之又少,反而間中會模仿近期商界職場大紅人莊偉忠先生(幻想中)…

一支公睇波

夜闌人靜,一支公,一台電腦,一杯酒,一邊打blog,一邊等睇波。

(不過小弟比較喜歡飲紅酒)

人到中年,

要係深夜等睇波又要寫文嘅晚上,我都會準備兩件睇波必備孖寶!

睇波

 

  1. 冰涼頸圍巾:只要沖睇波沖水就會變凍,唔洗事先雪凍。圍係條頸成個人都醒神d,冇咁易瞓得著。
  2. 紅酒保鮮瓶塞: 一個人一晚絕對飲唔哂一支紅酒,唔想做個大嘥鬼浪費紅酒,就用個保鮮瓶裝起佢留番下場波再慢慢品嚐。

聽聞今個星期又有曼徹斯特打吡大戰,雖然夜晚十點幾就開波,但都係時候準備睇波孖寶同埋激烈熾熱嘅反曼民族情緒喇! 😛

英超睇波

莊偉忠先生教落,

十年窗下無人問,都未必可以一夜成名天下知。都係果句,唔係見到有希望先去堅持,係堅持左先有希望呀!

睇波

所以呢…

苦幹多十年先定斷啦,唔係父幹呀~

致正在默默苦幹中的你: 共勉之。

 

下回預告: 講下打足球game,講下兄弟情。

NO COMMENTS